Buddhism Book in Myanmar Language

e-Book in Myanmar

သာမဏေကျော် စာသင်သားများအတွက် ကျမ်းစာအုပ်များ

_/\_ _/\_ _/\_

သံဃာတော် အရှင်သူမြတ်တို့ ဘုရား..

ပဋိယတ္တိ သာသနာကို ဝိုင်းဝန်းကူညီ ပံ့ပိုးပေးရန် ရည်ရွယ်၍ စာသင်သား သံဃာတော်များအတွက် သင်ရိုးညွှန်းတမ်း ပြဋ္ဌာန်း စာအုပ်များ၊ မှီငြမ်းစာအုပ်များကို လက်လှမ်းမှီသလောက်စုဆောင်း၍ eBook များ အဖြစ်တင်ပြလာခဲ့သည်မှာ ယနေ့ဆိုလျှင်

၁) ဓမ္မကထိကဆရာတော်များအတွက် ကျမ်းစာအုပ်များ (၉) အုပ်

၂) ဓမ္မာစရိယ စာသင်သားများအတွက် ကျမ်းစာအုပ်များ (၅၀) အုပ်

၃) ပထမကြီးတန်း စာသင်သားများအတွက် ကျမ်းစာအုပ်များ (၃၉) အုပ်

၄) ပထမလတ်တန်း စာသင်သားများအတွက် ကျမ်းစာအုပ်များ (၃၄) အုပ်

၅) ပထမငယ်တန်း စာသင်သားများအတွက် ကျမ်းစာအုပ်များ (၂၃) အုပ်

၆) သာမဏေကျော် စာသင်သားများအတွက် ကျမ်းစာအုပ်များ (၂၅) အုပ်

စသည်ဖြင့် ရှိခဲ့ပါပြီ ဘုရား..

တပည့်တော်တို့ အနေနဲ့ ပိဋိယတ္တိစာပေသင်ကြားရေး အပိုင်းကို ကူညီပံ့ပိုးပေးနိုင်ရန် သဒ္ဒါတရားသာရှိပြီး မည်သို့သော စာအုပ် စာပေများသည် သံဃာတော်များအတွက် အသုံးဝင်သည် မဝင်သည်ကို၊ မသိနိုင်ပါ.. စာအုပ်ဆိုင်ထဲဝင်၍ တွေ့သမျှ ဝယ်ယူနေသည့် နည်းကိုဘဲ အသုံးပြုနေရပါသည်။ သို့ ဖြစ်ပါ၍ တပည့်တော်တို့အား ကူညီသောအားဖြင့် တပည့်တော်တို့ dhammadownload.com website တွင် မရှိသေးသော စာအုပ်များကို

၁) စာအုပ် ခေါင်းစဉ်၊

၂) စာအုပ် ရေးသားသူ

၃) website တွင် တင်ပြနိုင်သည့် Session

စသည်ဖြင့် ဝိုင်းဝန်းဖေါ်ပြ၍ dhammadownload.admin@gmail.com သို့ email ပို့ပေးကြပါရန် မေတ္တာရပ်ခံ လျှောက်ထားအပ်ပါသည် အရှင်သူမြတ်တို့ ဘုရား

ဗုဒ္ဓသာသနာတော်ကြီး၏ ပဋိယတ္တိ ပညာသင်ကြားရေးနည်းစနစ်ကို မိမိတို့ တတ်ကျွမ်းသမျှသော ခောတ်မှီနည်းစနစ်များဖြင့် ဝိုင်းဝန်း ထုံမွှန်းရင်းဖြင့် သာာသနာတော်ကြီး၏ အသိတရားများ လူသားတိုင်း၏ ရင်တွင်းသို့ စီးဝင်ပြန့်နှံ့ပါစေကြောင်း.. ဆုမွန်ကောင်း တောင်းလိုက်ပါသည်..

_/\_ _/\_ _/\_

သာမဏေကျော်စာမေးပွဲကို မန္တလေးမြို့ ၃၅လမ်းရှိ ဦးလှသိန်းဗိမာန်တွင် ကျင်းပသည်၊ နိုင်ငံတော်စာမေးပွဲမဟုတ် ၊ အမျိုးသားစာမေးပွဲဟု ခေါ်တွင်သည် ၊ မဟာဂန္ဓာရုံဆရာတော်ကြီးကိုယ်တိုင် ပြဋ္ဌာန်းကျမ်းစာများကို သတ်မှတ်ပေးခဲ့သည် ၊
သာမဏေကျော်စာမေးပွဲ ဖြေဆိုသူများသည် အရည်အချည်းပြည့် စာတတ်ပေတတ် ပုဂ္ဂိုလ်များဖြစ်လာကြသည် ၊

ပထမဆင့် သည် နိုင်ငံတော် ပထမလတ်တန်းနှင့် ညီမျှသည်၊
ဒုတိယဆင့်သည် ပထမကြီးတန်းနှင့် ညီမျှသည် ၊
တတိယဆင့်သည် ဓမ္မာစရိယတန်းနှင့် လုံးဝမတူညီသော်လည်း တတိယဆင့်အထိ လေ့လာဖြေဆို အောင်မြင်သူ သာမဏေ ကိုရင်များသည် ဓမ္မာစရိယတန်းကို တနှစ် နှစ်နှစ်ဖြင့် လွယ်ကူစွာ ဖြေဆိုအောင်မြင်ကြသည် ၊ (သာမဏေကျော်စာမေးပွဲ မဖြေဆိုဘူးသော သူများသည် ဓမ္မာစရိယတန်းကို သုံးနှစ် လေးနှစ်မှ ဆယ်နှစ်အထိ ဖြေဆိုကြရသည် ၊)
ပထမအဆင့် ဒုတိယအဆင့် တတိယအဆင့်.. အဆင့်သုံးဆင့်လုံးအောင်မြင်လျှင် သာသနာလင်္ကာရ သာမဏေကျော်ဘွဲ့ကို ရရှိသည် ၊ ဥပမာ. မူရင်းဘွဲ့ အရှင်တိက္ခဉာဏ ဆိုပါစို့.. သာမဏေကျော် စာမေးပွဲအောင်ထားပါက အလင်္ကာရ ဆိုသည့် ဘွဲ့ထူးကိုဖော်ပြ၍ အရှင်တိက္ခဉာဏာလင်္ကာရ ဖြစ်လာသည် ၊

သာမဏေကျော် စာမေးပွဲ အကြောင်း

သာမေဏေကျော် တစ်ပါး ဖြစ်လာရေးအတွေက် ဖြတ်သန်းခဲ့ရသော အဆင့်အတန်းနှင့်ပြဌာန်း ကျမ်းစာများမှာ
ပထမဆင့်တွင်
(က) ဝိနည်းမဟာဝါ ပါဠိတော်
(ခ) အင်္ဂုတ္တိုရ်ပါဠိတော် (ဧကနိပါတ်မှ တိကနိပါတ်အထိ
(ဂ) ဓမ္မပဒအဋ္ဌကထာ (ယမကဝဂ်နှင့် အပ္ပမာဒဝဂ်အကုန်အထိ)
(ဃ) သဒ္ဒါ-၅-စောင် (သန္ဓိ-နာမ်-ကာရက-အာချာတ်-ကိတ်)
(င) အဘိဓမ္မတ္ထသင်္ဂဟ အောက်သုံးပိုင်း ( စိတ်-စေတသိက်-ပကိဏ်း)

ဒုတိယဆင့်တွင်
(က)စူဠဝါ ပါဠိတော် /ပရိဝါ ပါဠိတော်
(ခ)အင်္ဂုတ္တိုရ်ပါဠိတော် (စတုက္ကနိပါတ်မှ ဆက္ကနိပါတ်အထိ))
(ဂ)ဓမ္မပဒအဋ္ဌကထာ(စိတ္တဝဂ်မှဒဏ္ဍဝဂ်အထိ)
(ဃ) သဒ္ဒါ-၇- စောင်( သန္ဓိ-နာမ်-ကာရက-အာချာတ်-ကိတ်-သမာသ်-တဒ္ဓိတ်)
(င) အဘိဓမ္မတ္ထသင်္ဂဟ ခြောက်ပိုင်း (စိတ်-စေတသိက်-ပကိဏ်း-ဝီထိ-ဝီထိမုတ်-ရုပ်)

တတိယဆင့်တွင်
(က) ပါရာဇိကဏ်နှင့် ပါစိတ်ပါဠိတော်
(ခ) အင်္ဂုတ္တိုရ်ပါဠိတော်(သတ္တကနိပါတ်မှ နောက်ဆုံးဧကာဒသကနိပါတ် အကုန်အထိ)
(ဂ) ဓမ္မပဒအဋ္ဌကထာ (ဇရာဝဂ်မှ နောက်ဆုံးဗြာဟ္မဏဝဂ် အထိ
(ဃ) သဒ္ဒါရှစ်စောင်( သန္ဓိ-နာမ်-ကာရက-အာချတ်-ကိတ်-သမာသ်-တဒ္ဓိတ်-ဥဏာဒ်)
(င) အဘိဓမ္မတ္ထသင်္ဂဟ ကိုးပိုင်း( စိတ်-စေတသိက်-ပကိဏ်း-ဝီထိ-ဝီထိ မုတ်-ရုပ်-သမုစ္စည်း-ပစ္စည်း-ကမ္မဋ္ဌာန်း) ဟု ပြဌာန်းထားသော ကျမ်းစာများ ဖြစ်ပါသည်။

တစ်ဆင့်ကို တစ်နှစ်ဖြေဆိုရပါသည်၊ အောက်အဆင့်အောင်မှ အထက်အဆင့်ကို ဖြေဆိုခွင့်ရ ပါသည်၊ အလင်္ကာရ ဘွဲ့ရ သာမဏေကျော် တစ်ပါး ဖြစ်ရန် တစ်နှစ် တစ်တန်းအောင်ပါမှ အနည်းဆုံး သုံးနှစ်ကြာအောင် ဖြေဆိုရပါသည်။

သာမဏေကျော် ဖြစ်ပြီး ပုဂ္ဂိုလ်များသည်----
၁။ ပါရာဇိကဏ်ပါဠိတော် စာမျက်နှာ(၃၈၁)
၂။ ပါစိတ်ပါဠိတော် စာမျက်မှာ (၄၇၀)
၃။ မဟာဝါပါဠိတော် စာမျက်နှာ (၅၁၁)
၄။စူဠဝါပါဠိတော် စာမျက်နှာ (၅၀၈)
၅။ ပရိဝါပါဠိတော် စာမျက်နှာ (၃၉၀)

စုစုပေါင်း ဝိနည်းငါးကျမ်း စာမျက်နှာ (၂၂၆၀) တို့ကိုလည်းကောင်း၊ အင်္ဂုတ္တိုရ်ပါဠိတော် ပထမအုပ် စာမျက်နှာ (၅၈၀) အင်္ဂုတ္တိုရ်ပါဠိတော် ဒုတိယတွဲ စာမျက်နှာ (၅၁၃) အင်္ဂုတ္တိုရ်ပါဠိတော် တတိယတွဲ စာမျက်နှာ (၅၅၈) စုစုပေါင်း အင်္ဂုတ္တိုရ်(၁၁)ကျမ်း စာမျက်နှာ (၁၆၅၁)တို့ကို လည်းကောင်း၊
ဓမ္မပဒ အဋ္ဌကထာ ပထမအုပ် စာမျက်နှာ(၄၄၇) ဓမ္မပဒအဋ္ဌကထာ ဒုတိယအုပ် စာမျက်နှာ (၄၅၄) စုစုပေါင်း ဓမ္မပဒအဋ္ဌကထာ (၂၆)ဝဂ် စာမျက်နှာ(၉၀၁) တို့ကိုလည်းကောင်း၊
သဒ္ဒါ(၈)စောင် တို့ကို လည်းကောင်း သင်္ဂဟ(၉)ပိုင်း တို့ကို လည်းကောင်း၊ သင်အံ လေ့လာ ပြီးဖြစ်သောကြောင့် အထက်တန်း ဖြစ်သော ဓမ္မာစရိယ စာမေးပွဲ နိကာယ်စာမေးပွဲ တိပိဋကစာမေးပွဲ တို့တွင်လည်း လွယ်ကူစွာ လျေက်လှမ်း နိုင်ပါသည်။ စာချကောင်းတစ်ပါး ဖြစ်နိုင်သကဲ့သို့ ဓမ္မကထိကကောင်းတစ်ပါးလည်း ဖြစ်နိုင်ပါသည်။ အမရပူရ မဟာဂန္ဓာရုံ ဆရာတော်အရှင်ဇနကာဘိဝံသ-က စာမေးပွဲ စည်းမျည်း ရေးဆွဲပေးတော်မူပြီး မန္တလေးမြို့ ပရိယတ္တိသာသနဟိတအသင်း( သကျသီဟ) အသင်းက မြန်မာသက္ကရာဇ် ၁၃၁၁-ခုနှစ် လောက်က စတင်ကျင်းပသည်ဟု သိရပါသည်။

တစ်ဘာသာလျင် တစ်ရက်ဖြင့် သုံးဘာသာ သုံးရက်ဖြေရပါသည်။ သုံးဆင့်လုံးအောင်လျင် သာမဏေကျော် ဘွဲ့ ဆက်ကပ်ပူဇော်ပါသည်။ သာသနာပြု ဆရာတော်များသည် သာမဏေကျော်ဘွဲ့နှင့် ထိုက်ထန်အောင် သာသနာတော်အတွက် လုပ်ဆောင်လျက် ရှိသည်ကို လေ့လာ သိရှိရပါသည် ။ အစစ်အမှန် သဒ္ဓါတရားဖြင့် အစစ်အမှန် သာသနာပြု လုပ်ငန်းများကို လုပ်ဆောင်လျက် ရှိသော သာမဏေများအား ထောက်ပံ့ ပူဇော်နိုင်ကြစေရန် ရည်သန်လျက် သာမဏေကျော် စာမေးပွဲ အကြောင်းကို လက်လှမ်းမှီ သလောက် တင်ပြ လိုက်ရပါသည်။